<有票你要唔要> 媽咪姐
九月四日立法會選舉,身為香港人就當然要盡公民責任,早前藍奕邦就POST咗FB,叫人記得投票,網民亦都狂LIKE狂SHARE,邦邦一向都係正氣仔,如果你好記性,應該知道早幾個月佢屋企外面發現一個雀巢連蛋,但鄰居仲要求佢拆咗個卵巢,結果POST完FB再推上報,網民亦都一致力撐。 唔止,ALEX FUNG馮翰銘都有POST張選舉信叫大家投票,WYMAN亦有發功,叫人盡責任,甚至等選舉結果等天光,認真有心。 嗱有心還有心,上一屆立法會選舉黃貫中就瀨嘢,四年前佢喺票站入面影咗張選票,結果警察上門拉人,攪完一輪再問律政師意見,卒之警告了事。相反坤哥今年就醒得多,只係POST張海報,仲提醒大家「喺票站影相係犯法嘅」,如果佢早四年紅咗,PAUL叔隨時可以避過一場官非。 其實而家後生仔咁有選舉意識,年尾頒獎禮整多幾個投票獎,一定大收旺場,唔洗去到半路中途已經變神功戲 ── 滿場空凳呀。
環球媽咪姐
<許勝不許敗之睇人XX最開心>
依家開演唱會,最令全香港人期待睇嘅,已經唔係歌手本身、更加唔係嘉賓,而係: 睇你點死。 一千幾百蚊睇你三兩個鐘加ENCORE已經係固有PACKAGE,咩係BONUS? 就係「意外」。只要演唱會有「意外」,我哋就有花生,我哋就會等睇關公災難,但唔係黑心,觀眾最想睇,就係睇你點執生、點樣由輸變羸。 自從黎明開始,喺中環海濱第一場演唱會,因為消防條例被禁止演出,當日下午即開記者會,鞠躬道歉,呢單嘢竟然上曬全港Breaking News,連有線新聞台都彈埋突發線出嚟(黐線架真係,呢啲算新聞?),然後得到全港掌聲,由「睇你點死」變「全城撐黎」,原來好簡單,衰咗肯認就得,係囉,你睇,香港市民近年受咗幾多氣? 鄭秀文今次都係「睇你點死」,第一場就炒粉,之後嘅壓力可想而知,佢亦都做咗同一動作: 認衰,然後爆喊叫觀眾退票,呢句BITE勁架,都入得嚟都撐你,幾舊水都攞番真係好冇雷氣,反而邊個去退票就一定被記者追訪到傻。到第二晚,「睇你點死」! 但唔知天意定人為,竟然就係第二場借到東風黃子華! 喂,子華冇上紅館咁耐,同你吹十二分鐘攪下GAG已經係神級SHOW,成單嘢,就係由悲劇變喜劇,敗部復活喎。經黃子華撩咗兩嘢,已經救番曬,而我估,林海峰一定會做嘉賓,再推番起成單嘢。其實,搵個牧師上嚟都得嘅,如果真係好笑嘅話,但唔覺有囉。 既然呢條「公關災難」橋可以咁用,下次城城可以自製拗柴,然後道歉再死頂跳足咁多場,包你成為又一傳奇。
環球媽咪姐
我真係恭喜你
出爐港姐馮盈盈FACEBOOK曾經爆粗鬧政治人物,我真係恭喜你呀,快……啲同我捧紅佢,因為冇呢單料爆,好多人都唔知原來大台已經選完美,先唔講馮盈盈鬧邊個同對與錯,媽咪姐呢度反而想講下歷年娛圈粗口事件(部分咋,要講一本書都講唔曬: 1) 某著名港姐: #我真係恭喜你呀 #快恨啲同我捧紅佢 #你唔捧佢簽佢嚟把……呀 #紅恩呢個HIHIHI女人 ,唔明嘅話,自己上網SEARCH以上HASHTAG 2) 阿SA蔡卓妍: 「我有俾你HI架」,沿自電影《雛妓》,成套戲就係紅呢句對白,成為網民經典 3) 劉德華:1995年無線台慶讀出「杏加橙」三字,接600宗投訴,無線被罰十萬,劉特首被雪藏一輪,再出報紙向冚香港致歉 4) 梁漢文: 1995年《歡樂滿東華》中,唱唱下東華主題曲,佢成句「唔好咁L嘈啦」入曬咪,好多人市民聽到,由於當年未有YOUTUBE,呢單嘢只會喺TVB留底 5) 鄭融: 2011年喺無線娛樂新聞台,做口型講「X你老母」,又被TVB雪藏 6) 吳若希:有網民借佢阿媽意外開玩笑,佢用X街嚟形容該人,反而有正評 不過亦有反粗口派: 1) 傅穎 (Theresa): 自稱當年讀書時喺廁所對鏡講咗句「X街」之後(!),打咗個冷震,以後冇講 2) 黃翠如: 以前覺得講粗口冇嘢(節目講嘅),最近好驚粗口(消防員致敬被留粗口刪留言事件)
環球媽咪姐
【星級專欄:媽咪姐】到咗呢個MOMENT,要爆喇!
張如城早兩日開慶功記招,話《紅日之火》網上點擊率好勁,單喺騰訊有15億點擊,仲想乘勢開演唱會:「有人想贊助我今年紅館開,但未入紙,有贊助而係場地問題……」 明嘅,當日到場嘅香港傳媒只有四間,我唔明白點解香港人要冷待張如城,就算佢入唔到紙,憑佢嘅正能量,都可以有以下選擇,由低唱起,一步一步邁向夢想嘅舞台……
環球媽咪姐
【星級專欄:媽咪姐】呢啲就係我成日同你哋講嘅:專業
早個禮拜,媽咪姐去咗睇葉德嫻倫永亮同趙增熹嘅<紅白藍>演唱會,傳媒都集中報導有乜嘉賓之類,反而有單嘢非常重要,而冇乜人講。 葉德嫻好嚴格就係人都知,全香港只得佢,話開八點三就堅開八點三,準時落閘果隻,遲到係你自己責任,無謂浪費大家時間,佢都講明自己就好似外星人,原則嘅嘢一定要守,喺香港能夠咁做,不能不服。 表演首晚,葉德嫻其實入錯兩次歌,所有觀眾都聽到,暗裡為佢打氣,須知Deanie姐出年已經七十歲,有甩漏在所難免,一定體諒,殊不知佢老實不客氣,認錯兼重頭叫成團管弦樂團重新玩過隻歌,你就睇到佢團火,認真到你班後生知驚,貴為一位專業表演者,呢個Message非常重要,係話俾班後輩知,上得台就要交捉功夫,對得住每一位耳朵,而觀眾亦都勁感動,拍爛晒手掌,呢單嘢竟然冇人講,但在場人士一定知道。 呢個世界,尤其娛樂界,無符碌,更加唔容許你揸流灘,有日你七十歲仲上到台表演,你就知有幾難做,香港人唔蠢,你係流定堅,大家有眼見。
環球媽咪姐
【星級專欄:媽咪姐】現真身,打真軍
十月七日,就係小妹現真身嘅日子,好多記者朋友想起我底(喂記者朋友你好),因為我擺明嚟踩場辣火頭,在場甚至有人話我係瓊姐分身,我可以話你聽,唔係囉。總之兩句講晒: 娛樂圈嘅料,我又點會少。
環球媽咪姐
【星級專欄:媽咪姐】獨家料: 關於張學友演唱會加場
張學友跨年演唱會加咗場(12/31, 1/1, 1/2)相信大家都知,前後23場都爆到瀉, 全香港個個都要貨,係喇,係我爆料時候喇! 嗱你唔好咁天真,以為媽咪姐呢度有飛放,我只係想提醒除夕場(12/31)觀眾,開始時間係七點半,比平時更早,點解呢,因為唔會有倒數 (係呀一反紅館除夕場傳統),所以你可以約定腳去下場,痴情嘅FANS當然可以喺停車場閘口自行圍爐倒數,即使學友已經趕住同家人朋友團聚。
環球媽咪姐
【星級專欄:媽咪姐】找數真漢子
藍奕邦喺十月十日出咗FB POST,講話同情人一週年,仲公開講愛對方(詳情COPY喺下文),藝人嚟講,佢都算SWEET,大家都洗版式留言,「我真係恭喜你呀」聲音不絕,你就知佢幾受歡迎。媽咪姐見慣好多藝人都好避忌講自己感受同感情,因為私人嘢唔想公開又或者驚趕走FANS,但依家呢個年代,肯大大方方講自己感受、態度、取向,先至會得民心。網絡世界已經將偶像同平民距離拉近,你試幻想下今日張國榮梅艷芳如果經常POST FBIG,你都會覺得冇咁神級。 媽咪姐回下帶,藍奕邦喺去年12月,被記者影到中環親吻一位朋友(見下圖),仲幾親密下,咦,時間幾吻合喎,會唔會係呢位幸運兒呢? 藍奕邦現時身在加拿大,放完閃之後,亦冇再補充,我會繼續同大家跟進。另外我都恭喜藍奕邦,希望每年十月都睇到你慶祝週年紀念啦。 但係,估唔到兩日之後,另一面又有壞消息,傳聞軒仔同智斌十年(疑幻疑真)感情劃上句號,喺網上睇到大家都非常婉惜。這邊箱慶祝一週年,那邊箱又十年作結,緣份嘅嘢我真係識條鐵。 註:藍奕邦FACEBOOK原文 《摺埋的20蚊紙》 大學教授上課堂,拿出一張20元紙幣,問一眾學生:「有誰想要這張銀紙?」 當然,全體學生都舉手。 教授見狀將銀紙對摺,再問:「現在呢?誰還想要這張銀紙?」 依然,全體學生都在舉手。 教授於是繼續摺細那張20元紙幣,每摺一次,就再問一次誰還想要,但是,學生無一放低手。 直到最後,那張銀紙被對摺再對摺成一粒,不能再摺小了。教授再問一次,誰還想要。 結果,所有學生依舊全部舉手。 教授說:「無論20元紙幣被摺到如何小,它的價值還是一樣不變。人也是一樣,我們可能有時候覺得自己好『摺埋』,被周遭壓逼到覺得自己很渺小,繼而看不到自己的價值,但在別人的眼中,你的價值與你的大小高低無關,根本一直無變過。」 剛巧,於今天我們一周年紀念日,您,跟我分享的一個小故事。 一年前今天,遇上您那個晚上,我就是那張「摺埋左」的銀紙。 我當時覺得自己不止已摺埋,甚至是,一張廢紙。 一年前,食藥副作用令我肥了30磅,又腫又樣衰。人亦迷迷糊糊,創作力亦彷彿不見了。痛,不舒服,但不知道原因,醫生亦只說診斷是「心理病」,不知道吃藥以外還有怎樣方法去醫,亦因為怕再失望而放棄了找別的方法去醫。工作,停頓了。歌,唱不出,寫不出。每天,吃,睡,吃藥,喝酒解悶。我完全覺得自己是一件不值得被愛的廢物。 偏偏,上天安排,不是在我最自信最掂覺得自己最hot的時候,而是在我人生最低點,一年前喝到酩酊大醉的一個晚上,遇上您。 您沒有介意過我肥。您沒有介意我有病。您更不在乎我是一個歌手,更何況是一個無工開的歌手。您喜歡我,因為我是我。您讓我知道,我,是大於我的身分外型和標籤。 最重要,在我自覺最無用之時,您讓我重新發現,我原來還有能力去愛一個人,還有能力接受別人的愛。這,就已經足夠令我有最好的存在價值。 在我最想放棄自己之際,您彷彿天使般來到,救了我。令我對世界及自己重新再抱希望您,將摺埋既我慢慢摺番開。 如果沒有您,一年後今天,我可能繼續在吃藥,繼續晚晚飲酒,繼續病而不去醫,更肥更腫,徹底失去了所有要好起來的鬥志。 這一年,沒有您,不知怎算。您簡單的相陪,一個笑容,一個短訊,已是我堅強的最佳理由。 我答應您,我一定要好起來,將來給您給過我的最關懷的照料。 一周年快樂。我相信,我們會走得很遠、很遠。 多謝您。我愛您。 #iloveyou #thankyou #imnotafraid #nofucksgiven #藍奕邦歸位 #別忘掉原是靠堅持醫好每個傷患 #至少我明白 #至少您都明白 #誰真正能令枕邊一人笑雲會起風先會湧 #愛著您令我明白我有用 #顳顎關節症候群 #TMJ
環球媽咪姐
【星級專欄:媽咪姐】今年金獎又係......亞發外父?
年尾開始結數,商台女員工又流出叱咤名單,瓊姐即時二傳,媽咪姐冇理由唔加把咀。 其實,每間公司都有一個女員工,今次「籃球女員工」亦放料我聽,話「城寨電台」今年會由百九幾二百個獎,縮到剩番六十個(係呀,之前地震郁完DJ之後,應該唔夠人頒掛?),嘩豬肉供應緊張,唱片公司仲唔癲? 張如城點算? 講番商台,女歌手銀銅,其實都幾激烈(至於金獎,你望到尾燈咩?),AGA、 GIN LEE、欣宜、JW 各有千秋,幾位今年成績唔錯,有金曲之餘個演唱會又叫座,冇架,司儀袋定十包紙巾啦,銀銅獎一定喊到靈堂孝子咁。 至於男歌手,柏宇攞金,呢個有少少出奇,不過張敬軒上年攞過,今年再係「張容配」又的確幾悶,而柏宇BB今年PLUG歌又真係幾恆,一首四台冠軍一首三台冠軍,仲未計啱啱推出大碟同嚟緊嘅音樂會,11月至係陳柏字衝線期,呢隻絕對有機成為今年「巴基之星」。
環球媽咪姐
【星級專欄:媽咪姐】C1都未上,上A1
星期日,竟然見到自己地盤見報,仲要話係一場唱片業大戰,我當堂嚇咗跳,原來都唔係得啖笑,冇嘅,大家各有各辣慶個場,去刺激市民繼續支持本地音樂,幾好呀。呢個圈其實唔算好大,甚至可以講係唇齒相依,雖然唔想好老套講咩「百花齊放」,但起碼見唔到有惡性競爭。 補充下,報導冇提到一點,就係環球係第一個用WEBZINE型式去做,如果唔係媽咪姐都唔會喺度同你定期爆料。 (咁難得一次上頭版,點解唔登埋媽咪姐先,撞鬼當日個頭套真係好焗呀陰公)
環球媽咪姐
【星級專欄:媽咪姐】邊個爆料呢下
吳雨霏流產呢啲嘢都真係幾機密,唔係真正朋友都唔會知,KARY早前亦開POST(下圖)度講咗「好愕然,因為好少朋友知」,媽咪姐有兩樣唔開心嘅,一當然係可惜冇咗個小生命,二係KARY竟然俾朋友跣,究竟係邊位「朋友」咁樣爆料呢,講真自己圍內心中有數,有時啲嘢睇多幾個POST同報導,你都可以做金田一解開謎底。 KARY今次回應得好得體,亦希望佢走出陰霾,呀仲有,同埋要分清楚「真朋友」同「偽朋友」呀。 有娛樂記者同媽咪姐講笑,佢哋應該同各大婦產科聯繫,就唔駛有啲咩閨蜜朋友爆料咁話。
環球媽咪姐
【星級專欄:媽咪姐】佢係有六呎高,佢最怕特朗普
近日全世界焦點當然係美國總統大選,身處美加嘅藍奕邦亦都對特朗普當選發出賀電,媽咪姐英文唔係幾好,不過都知道藍奕邦非常激動之下,爆咗佢句粗。 之前都講過,藍奕邦係讀政治出身嘅,所以佢無論對本地到世界嘅政事都有留意,亦勇於發聲,呢類人喺香港娛樂圈真係比較少見,亞邦之前嘅部分作品都有回應時事,既然今次咁大反應,希望佢喺遠方磨墨整份靚詞出嚟囉。
環球媽咪姐
【星級專欄:媽咪姐】隨風而來
媽咪姐又有新料,達明一派將會喺2017年,舉行三十一週年活動,個名都諗埋喇,叫做「達明卅一派」(係囉呢啲名真係十年先用到一次),今次好玩,真係會同好多單位重新玩番達明經典,有觸執毛、假音人、MY LITTLE AIRPORT 、葉德嫻、陳珊妮、 AT17、藍奕邦、ALEX FUNG、盧海鵬同燦神(呢個有待證實呀下)等等。 唔經唔覺,達明已經陪住香港咁耐,後生仔女可能唔識,當年佢哋嘅歌,內容非常前衛,今夜星光燦爛(講香港末世時代)、十個救火的少年(講香港前途)、溜冰滾族(講年輕人世代)、禁色(講同性戀)、天問(呢個你自己研究下),高峰時期作品基本上都係八十年代,就係1984年中英聯合聲明之後,要研究香港當年嘅社會狀態,一定係聽達明。
環球媽咪姐
【星級專欄:媽咪姐】大夫......
歌手都係人,係人都會病,但歌手一病,尤其係攪到把聲嘅,就會好大件事,因為一次失準可以瀨嘢一世,廿幾年前黎明唱<對不起我愛你>單嘢今日仲有人講緊,所以行內都有好多神秘治療師。 最多人知道嘅,就係打開聲針,都常唔到好緊急都唔會打,譬如過兩日演唱會但開始失聲果類,呢種針好見效,但同時間又好傷身,所以一世人唔可以打超過三至四次。更奇怪嘅例子係靈性治療,唔洗用藥,好似武俠小說咁用氣嚟打通番個人,你可以話咁唔科學,但係又WORK喎,邊個試過? 我諗你都估到。 媽咪姐又收到風,原來有班歌手一有事,就會去佐敦睇一位醫師 ,醫師精通少林氣功、祖傳跌打、駁骨穴位、推拿仲有經絡治療,華陀咁喎,不過行內都有唔少歌手知道邊位,最近就有位姓劉嘅女歌手又上去,聽佢KEEP住咁靚聲,呢位醫師應該有啲料到,我都好想講邊位,但又廢事喺度賣廣告,咁啦,個醫師名係兩個字嘅,姓咩? 同「三個數字」位先生一樣嘅,今次爆住咁多先。
環球媽咪姐
【星級專欄:媽咪姐】張學友呼籲......
張學友SHOW已開,媽咪姐當然有潛入後台,但當然唔係打擾偶像,相反,係睇花籃。 其實今次學友已經呼籲,以捐錢代替送花籃,皆因環保之餘又可以更多人受惠,所以今次專登整咗個BACKDROP,寫上捐款人名字去代替花籃,呢個舉動絕對值得表揚,皆因由歌神發起,後輩就大條道理可以跟。 由於呢個跨年演唱會開成個月,冬至、平安夜、聖誕、除夕、元旦都喺度過,有理相信佢身邊至親至鍚嘅,都會呢幾日蒲頭(咪話唔提醒你),媽咪姐當然會睇實,有乜新料會繼續UPDATE大家。
環球媽咪姐
【星級專欄 : 媽咪姐】喺方丈背後講佢......好話
夢遺大師近日又出現番喺各大傳媒,仲要喺100毛拍埋片,明哥又要玩埋一份喎,老老豆豆,盲嘅都知做緊演唱會宣傳,今次冇人贊助,自然要份外賣力,達哥當然冇SAY NO。 嗱,眾所X知,達哥係記唔到對白,就算記到,都唔太流利,所以呢段片用多幾倍時間就預咗,媽咪姐當然有收風,仲同佢講咗幾句。已經成為虔誠基督徒嘅達哥,除咗會將「天父爸爸」掛喺口邊之外(係囉,著住出家人衫講耶穌呢下竟然冇錄低),私底下已經冇飲酒,但係就好中意飲汽水 (有圖呀嗱),至於煙喇喎,都有食嘅,不過都減少咗喇 (方丈煲煙樣請自行想像,廢事POST)。 聽聞達哥新哥<排名不分先後> 下禮拜見街,媽咪姐已經睇咗歌詞,真係好惹火,仲好貼地! 如果電台唔知咩原因唔播,一定要上網睇,我預言一定洗版,撐方丈!
環球媽咪姐
【星級專欄:媽咪姐】賣飛佛: 達明一派
又有達明新料,上次講到2017三十一週年演唱會,舉辦時間非常風頭火勢,因為就係踏正特首選舉果幾日,明哥同達哥點會唔玩嘢? 媽咪姐收風,佢哋已經錄起2017版本嘅<排名不分先後左右忠奸>,上一次版本已經係2012,好多人已經OUT咗,近幾年香港發生咁多事,邊位有幸入到圍出現喺歌詞呢? 明哥喺訪問講過可能聖誕會PLUG上台,唔知到時又會唔會變做敏感歌。
環球媽咪姐
【星級專欄 : 媽咪姐】係人定係鬼
早幾日達明終於PLUG新歌,然後FB呢幾日都狂洗版,好多網友話首歌好貼近時事,甚至將特首戰、立法會同雨傘革命都放晒落去,就似係呢幾年嘅香港回憶錄。媽咪姐有番咁上下年紀,其實細細個聽達明,已經知佢哋歌曲內容行到好前,呢個風格竟然KEEP到30年,由港英到依家都一樣企硬,其實達明多年嚟至少有幾首歌都係大陸禁歌,明哥好明顯一啲都唔介意,等我回一回帶俾你班後生睇睇: 今夜星光燦爛(暗示一九九七回歸問題社會有種末世意識)、十個救火的少年(暗示社會因為唔團結而走向絕路)、大亞灣之戀(諷刺當年起核電廠)、天問(1989年發生咩事呢下)、馬路天使同溜冰滾族(當年青少年狀態)、禁色同忘記他是她(同性戀)等等。 所以今次呢首 <排名不分先後左右忠奸 - 係人定係鬼>,真係濕濕碎,反而媽咪姐收到風,達哥原來錄音時幾吃力,因為啲歌詞好矯口,唔知三月紅館演唱會時會唔會甩呢? 講開演唱會,今次係四面台,仲要中間有條大RUNWAY,算係不惜功本嘅,至於賣飛方面,最貴九百蚊一早冇曬,不過唔洗怕,$780後少少反而睇四面台會更清楚,咪話唔提你,三日演出都好似有唔同嘉賓,睇你好唔好彩撞正心水喇。 排名不分先後左右忠奸 - 係人定係鬼 作詞:佚名 作曲:梁柏堅 習小平 鄧小平 游蕙貞 CY 與頌恆 彭定康 七警 雨傘人 廢青 左膠與 楊岳橋 馬雲 惠詩 日曦 加多個陳奕迅 朱凱迪 哇 有長毛 廢克儉 雷動廷 何詩 發哥 五月天 張曉明 林鄭 有秋生與 Supper 張志剛 董建華 欣宜 仲有民建聯 達哥 業坤 陳雲 瓊姐 牛丸 曾主席 曾俊華 呢 睇清楚呢次 習爺定靠江 蜘蛛仔 Andy Lau 羅冠聰 ( DQ ) 梁天琦 強國猿 陳德霖 胡國興 朱經緯 亂咁毆葡萄淑儀 彤叔炳江 大劉甘比 民海 李波 林榮基 古仔 與關公 之鋒 小鳳姐 慢必 蔡英文 (舉起傘班人 ,普選會成真) 曹星如砌張德江 黃子華寸 DONALD TRUMP HeHe 鳩嗚 港豬 本土 釋法玩到好大 達明仲有膠派喎 齊昕化妝 龍蝦放湯 頌昕硬闖 下個特首都愛黨 呢 普選請快降臨救香港
環球媽咪姐
【星級專欄:媽咪姐】香港人嘅樂隊
近日睇到幾篇報導,都係講達明呢個演唱會係香港首個冇贊助嘅CONCERT,原因好令人沮喪,就係贊助商全部都政治敏感,講到明心入面支持,但科水果下就好驚,奇怪奇怪。媽咪姐當然明白,但明哥都夠膽企出嚟唱嘢同表達自己意見,點解會唔支持下呢(而好明顯大家都係有共同信念)? 話晒大家都香港人,三十年來明哥都企咁前,由八十年代到2017,都仲企硬唱偏鋒題材,此乃港人之福。 好喇,冇人贊助又如何? 都可以攪啫,媽咪姐上網睇咗大部分留言甚至好多朋友CHAT GROUP,都拍晒心口話撐場,香港人始終都係識貨,我就當然會入場啦,剩係睇達明CONCERT後面嘅VISUAL,舞台設計同文字,已經值回票價,舉辦日期仲要係特首選舉幾日,隨時有嘢爆架明哥,我信你。
環球媽咪姐
【星級專欄 : 媽咪姐】黑馬
今個星期日就係渣打馬拉松,同往年一樣,好多歌手DJ都有參加,當日凌晨一定洗版,媽咪姐當然會睇實。其實跑馬拉松對歌手非常有幫助,最老套當然係形象健康啦,咁體育用品贊助又易咗,廣告都係歌手收入來源之一。除此,跑步當練氣已經係常識,橫惦都要做GYM KEEP,不如跑埋。心理上,歌手嘅生涯一定有起跌,長跑可以練到意志力,所以公司一定鼓勵你咁做。 有朋友向媽咪姐報料,話練跑時撞到偶像,邊個? AGA喎原來係(喺邊度就唔講喇,自己同去佢IG睇啦)。我再查探一輪,原來AGA半年前先開始練跑,今年仲夠膽死跑半馬! 所以大家出開街,都會見到佢啲廣告,今年有份跑半馬嘅朋友,隨時隔離就係AGA。 AGA喺網上嘅音樂FORUM成績唔差,好多網友都有投佢票,今年出道第四年,照勢睇年尾會爆出,媽咪姐係欣賞啲默默苦幹型嘅妹妹仔,大家睇實佢跑成點就知。
環球媽咪姐
【星級專欄 : 媽咪姐】 逆向宣傳
達明演唱會又一風波,嗱之前冇人肯贊助已經算,依家連海報都要清算。早兩日明哥喺FB放料話有人見到自己喺張海報度出現,好驚大陸啲生意冇咗之類,要求將海報下架。喂其實啲相已經買晒COPYRIGHT,落架係人情唔落架係道理,不過聽講主辦單位都係明白人,結果呢張海報已經消失於市面。 嗱你唔好諗住媽咪姐會喺度爆果位係邊個,因為都要尊重人嘅。今次海報下架事件應該係樂壇首次,達明呢次演唱會啲新聞真係多到瀉,仲單單離奇,咁啦,希望演唱會順順利利,今次就當逆向宣傳,起碼都見到網民幾支持佢兩個。
環球媽咪姐
【星級專欄 : 媽咪姐】癡心情長劍
情人節,藝人歌手,有另一半嘅當然即時曬命,博下上報,大家都睇到悶。地下情果啲,就一定唔會出街,頂多留喺屋企碌FB IG (今年特別啲,情人節竟然被七警案同IRONMAN洗版),但又一位仁兄,寫咗篇幾令媽咪姐感動嘅嘢。 唔洗驚,唔係晶哥,係藍奕邦,佢篇嘢講乜大家都明(睇圖),冇乜作撞但又同時算係向另一半感恩,又順手PLUG埋自己幫達明一派唱嘅<禁色>,一個POST中幾注,恰到好處。如果你哋好記性的話,一月一叱咤,<女神>得獎,亞邦已經喺台上多謝過呢位伴侶,仲公開講I LOVE YOU(小道消息:呢位神秘人物當日在場),加埋今次,藍奕邦都可算係癡心情長劍,如果真係結埋婚,我就真係恭喜你呀,娶咗個咁好……好……好女人番去,希望阿邦今年被捧紅咁就事業愛情兩得意喇。 (PHOTO FROM : 瓊姐娛樂台FB)
環球媽咪姐
【星級專欄:媽咪姐】劫機嘅嘢,我哋識條跑道
呢幾日啲新聞追到大家睇唔切,早兩日black eye peas(BEP) 開show,宇宙走上台被噓事件,其實都已經夠大家花生,花生大賣原因,當然係同一單嘢但有兩邊唔同講法至係好笑。 首先宇宙就話自己朝早收BEP call,問佢當晚玩唔玩(見下圖佢ig自爆),睇落非常合情理,但轉頭主辦單位又話完全唔知情(又見圖),咁即係溝通上問題定係點呢? 總之,BEP多年來咁受歡迎,今次俾人噓爆應該都係難忘經歷。 媽咪姐再入去宇宙個ig睇留言,發現好多人支持佢架,不過好多都係簡體字,唔太睇得明,當然亦有用純正廣東俗語落去踩場挑機嘅,大家得閒不妨花生下。回番帶,其實宇宙已經唔係第一次喺大show瀨嘢,2013年Clockenflap請過佢做表演,亦都觸動到不少樂迷神經話要杯葛。至於今次現場情況,媽咪姐問過在場朋友,原來真係噓得好勁,粗口更加少不免,令大家有一個好難忘嘅晚上。 騎劫呢家嘢,上個禮拜另一家姓鄧嘅就玩得高手好多,仲要喺殯儀館玩喎,係呀我講祥嫂,明明係一個悲哀嘅場合(魯芬出殯),祥嫂竟然搬呀兆尊呀、祥哥呀、澳門華哥呀、甚至連分家產都講埋,隔離助攻嘅夏蕙姨完全唔駛惦波咁劑,結果成功洗版,個位又冇得失到主人家,但又令大家笑到今日(有啲娛圈朋友直情背曬成段嘢),呢啲至係劫機界老薑,我哋啲後輩真係識條跑道。
環球媽咪姐
【星級專欄:媽咪姐】美女語孿秀
估唔到迪迪尼一套真人版《美女與野獸》都可以攪出風波,事緣呢套真人版電影有少部分同性戀劇情,衛道(或偽衛道,我知你明)撲出嚟話係洪水猛獸,會「教壞」小朋友,呢單嘢我諗住都煲唔起,點知都洗到一輪版,娛記真係唔講得笑。 首先反方代表有楊思琦同學,佢話呢類意識會影響小朋友諗法,對心智未成熟巳會影響身心發展。而正方代表有陳慧琳同學,佢話會自己睇咗先、過濾咗先。太細嘅唔知咩事,大啲知道就要解釋畀佢哋聽,人係有呢個取向,亦唔會抗拒話畀小朋友聽,宜家好open,最重要係自己知道自己要啲乜嘢,就算係同性戀都唔使㩒住『我係鍾意異性』,因為覺得唔需要,等佢早啲知道『乜原來唔係一個罪』,唔好覺得自己做錯事,灌輸正確態度畀佢哋知。 先唔評論誰是誰非,KELLY陳同學能夠一口氣講到論點,亦都好了解同性戀本身係天生而非罪,仲會自己主動接觸呢類資訊,絕對係一個稱職負責任家長。教小朋友已經唔似以前,如果只係「禁」同「撳」,當然唔算理性咁處理事情同睇法。 老老實實,家下班細路醒過你,有咩資訊都可以上網或喺同學間學識,幾歲人仔已經問到你口啞(喂係你班家長谷佢哋做天才先嘅),所以KELLY真係與時並進,蝦餃仔(劉昇)同小籠包(劉琛)真係幸運。 香港好多家長都放小朋友讀國際學校,除咗練成一口竹昇英文之外,最緊要思想文化價值都要同歐美接軌至算係重要。係喇今日媽咪姐真係媽咪上身,講咗啲育兒親子心得,不過睇下星媽點樣培育星二代都真係幾好睇嘅,花生得嚟又可以加兩咀嘛。
環球媽咪姐
【星級專欄:媽咪姐】達明演唱會絕密曝光
今年香港三月絕對係焦點,特首戰已經去到埋尾階段,日日有花生,慢少少都追唔切。另一邊達明演唱會都同時臨尾抽鞭,喺FB狂谷POST,連楊岳橋都訪問埋,仲有唔夠十日開SHOW,媽咪姐當然索到啲料八比大家聽。 首先,有冇嘉賓?聽講有,日日唔同,原諒我仲未扑到鎚肯定係邊個。不過講真,如果以薯片嘅選舉工程方向,佢嚟都唔出奇(就算唔上台做觀眾都夠轟動掛),因為連發哥早排都同薯片癲埋一份,而達明呢次演唱會係3月23至25,特首選舉3月26,時間上係非常配合。如果可以玩到每日出一個特首候選人(林鄭同胡國興)就真係世界級,當然,入得嚟達明主場係會聽到真正民意嘅,相信明哥都會就政治議題表態,記者朋友呢三日磨定墨等寫嘢都得喇。 另外,舞台方面,有圖有真相,個台係首次扯對角CATWALK台(見圖),個台當然會有好多特別效果,其中一個主角就係波波螢光幕(又見圖),至於真實情況係點玩,可能要過幾日潛入紅館至八到。
環球媽咪姐
【星級專欄:媽咪姐】達明演唱會攻略
睇完達明演唱會首場,再上網睇番新聞,好啦,媽咪姐唯有再做下補充,點都要比多啲料大家知。 其實首晚好多名人撐場,除咗俞琤鍾楚紅之外,有份幫達明填詞嘅林夕、黃偉文、周耀輝、何秀萍等都到齊(陳少琪就唔見),另外公民黨吳靄儀、立法會議員朱凱迪、羅冠聰都有到,敢言之星藍奕邦、後生一輩嘅游學修、100毛盤菜瑩子都喺度,媽咪姐真係潛入後台至睇到。 另外準備入場嘅觀眾,由於個演唱會太多MESSAGE同亮點,所以我都會講少少睇SHOW攻略,廢事你MISS咗啲好嘢。 1) 螢光幕: 個台係對角,除非係坐正黃綠區之間,又或者藍紅區之間,否則一定睇到個螢光幕,而佢彈出嚟嘅圖像同文字都有暗示,真係要用腦睇架。 2) Dancers 同 步操樂團: 夾埋有六十幾人,達明未試過拖咁多馬上台一齊表演,喺咁窄個台要編舞係好大限制,但你睇完一定會拍爛手掌。至於步操樂團,就係香港嘅珀珈斯樂團,佢哋喺海外係得過獎架,但平時真係要喺天橋底訓練,因為香港邊有地方比佢咃玩呢 3) 服飾: 例牌由Tomas主理,每次都冇失望,又係好多MESSAGE 4) 場景: 明哥講嘢唔多,觀眾真係要帶腦入場去解密碼,其中有諷刺教育制度,馬路天使同今夜星光燦爛又有另類含意,自己參透,達明觀眾普遍高質,媽咪姐完全唔擔心 香港人有隊咁高質樂隊,敢言又貼緊社會,連大陸人都專登飛落嚟睇,即使唱緊廣東話,佢哋依然會照受。所以媽咪姐都要提下香港人記得繼續支持。
環球媽咪姐
【星級專欄:媽咪姐】初錬呀
最近有一首歌長期洗我腦,就係Yan Ting(周殷廷)嘅《小姐你好》,因為都好一排冇乜快歌DANCEBEAT嘢,YT外型討好得嚟仲要跳得,呢位後生仔吸引咗唔少妹妹仔FANS,嗱,想近距離接觸佢嘅話,機會嚟喇飛雲! 媽咪姐收到風,4月7號YT會有個校服派對,叫YT Station party,諗住邀請唔同粉絲和同合作夥伴參與,唱歌跳舞呢啲當然唔少得,最神奇係有得抽YES CARD! 呢個真係期待,當年攞支電筒照閃卡、然後再拎番學校炒嘅經歷完全番晒嚟,想玩嘅朋友記低活動資料喇喂: 活動名稱: YT Station 歌手: Yan Ting(周殷廷) 日期: 7/4/2017 時間: 8-10pm 地點: The Hub 地址: 香港灣仔駱克道150-158號祥友大廈1/F Dress code: 校服
環球媽咪姐
【星級專欄:媽咪姐】周殷廷做兵? 辛苦過觀音兵
Yan Ting周殷廷(YT)入行之前,曾經喺新加坡當兵,大家以為新加坡冇戰亂又和平,應該冇韓國BIG BANG嘅T.O.P 咁辛苦啩? 點知唔問猶自可,一問之下,先知YT 係經過十八層地獄式訓練,今次呢個特備訪問,肯定大家會對佢另眼相看。 #軍事訓練 #24公里遠征 # 5點食早餐 #日日餐單都唔一樣 #放假你就想 #指甲污糟又要罰 #清潔唔好又冇放假 #櫃底有滴塵都唔俾放假 #其實係軍營定禁閉營 #200下掌上壓點變幾千下 #下次叫YT上台表演掌上壓唱歌 #音樂界應該得佢做到
環球媽咪姐
【星級專欄:媽咪姐】世上騙子多的是?
早前有單新聞話有人冒認陳慧嫻,喺網上籌款,然後公司即刻出聲明踢爆係假,嗱,呢單嘢你可以當娛樂新聞聽咗佢,過兩日沉底,但媽咪姐就好在意呢件事。 睇番陳慧嫻之前新聞,喺去年7月,佢生日嘅時候,曾經叫百幾位歌迷用捐款收據代替賀禮,為五間慈善機構捐咗五萬蚊。騙徒好明顯係睇中呢單事件,知道陳慧嫻歌迷樂善好施,然後乘機博懵。 媽咪姐一向好OK肯公開做善事嘅ARTIST,譬如早前學友演唱會,都呼籲將買花籃嘅錢捐晒去,將樂迷嘅善意變做行動幫助有需要嘅人。宜家有騙徒睇準呢啲機會,插支旗扮偶像籌款,講真醒少少嘅FANS都會睇歌迷會大圍做嘢,有乜人會上當先?頂多咪呃到一千幾百(雖然家下啲電話騙案郁下都呃到一百幾廿萬),分分鐘拉埋坐監都仲得。咁少利益都有人做,但係個結果就係攪到一啲善心人卻步,下次陳慧嫻真係做慈善,仲捐唔捐好? 無論點都係對成個社會冇利,究竟有幾壞心腸嘅人先會做得出?
環球媽咪姐
【星級專欄:媽咪姐】面目全非腳 VS 還原靚靚拳
近日有兩單娛樂新聞,都係講老化嘅,一張就係濱崎步公開演出,但身形變咗濱肥步(更多人話似恬妞),另一張就係木村去康城影展,44歲之年老態開始出嚟,髮型仲瀨瀨地嘢,網友仲話似足湯家驊咁話。嗱唔好剩係掛住講日本星,不如睇下香港代表又如何?
環球媽咪姐
【星級專欄:媽咪姐】媾壇潛力股分析
媽咪姐成日有班中女姊妹問有冇筍盤(男仔)介紹,因為唔係結咗婚就係同志,佢哋仲話自己要求唔高,五官正常身型正常,最好加兩滴才華琴棋書畫煎炒煮炸咁。喂有位大家都識,仲識武功好打得下,係呀唐伯虎呀嘛,小姐,你搵個市區樓盤低過五球應該仲易。 但有時候又真係咁橋,最近俾我搵到個類似嘅,仲要係幕前人,應該係話,最近由幕後上番幕前,佢就係ADRIAN FU符致逸。呢位仁兄上年係新人,而新人嚟講佢都夠資格坐關愛座,因為已經四十歲。但喺音樂界佢已經係OLD SEAFOOD,十幾年前已經幫EASON寫咗好多首HIT歌,你唱K如果有留意作曲人,就一定見過。 都係唔講音樂,講番八卦嘢。佢上年就同傳媒講未有女朋友,媽咪姐已經八到係真,直到出稿呢刻都係。再講下佢嗜好: 煮嘢食,西餐一流,熱愛品酒,威士忌專家,音樂就唔駛講,佢一埋部琴一彈一唱已經係全場焦點(有去睇LIVE就知我冇誇張),死未? 收到風佢之前喺中環大行番過IT工,落過大場,個樣四正(喂你話爆靚仔又未算),同年齡四十歲好少KEEP得咁好,而佢個人又幾孤僻低調,完全冇花邊新聞(連風都冇收過),CONFIRM直男,實幹才華型,仲要唔扮勁,呢啲都算係奇盤。你見好多男歌手三十幾歲就結婚,好似陳柏宇、周柏豪同林奕匡等,仲有個有料四條,邊度搵? 嗱我就唔係喺度公開同佢徵友攪咩PTGF PTBF嗰啲(你當我真係媽媽生?),只不過分享我觀察啫,佢時不時都會開MINI SHOW,我有朋友同佢喺台下傾計飲酒,話佢真人FRIENDLY的。之前有個香港01有個訪問好好笑,話佢係「港版RYAN GOSLING」,誇唔誇就見人見志,但起碼証明唔止我一個睇到呢一點。
環球媽咪姐
【星級專欄:媽咪姐】瀟洒哥
最近有單新聞好令媽咪姐興奮,就係偶像B哥哥重錄番兩首經典,分別係《一段情》及《要是有緣》,呢兩首歌都已經三十幾年歷史(大過好多讀者啦相信),但係今日聽一啲都唔OUT,錯,應該話鍾鎮濤從來冇OUT過。 唔明白嘅朋友,可能你太年輕了,話說溫拿時代(即係70年代),B哥哥頂替荷蘭叻(係呀就係成日見報嗰位)加入隊BAND,之後憑其高大身材,高音加磁性聲線,成為全BAND焦點,仲有大把少女FANS,搭咗隊友譚校長唔少鏡,咁當然陳友同OK仔老豆彭健新亦獨當一面,情形……有少少似今日BIG BANG咁,唔係誇張,你問下啲資深樂迷就知,係呀即係你亞爸亞媽。 之後八十年代全部變個人發展,B哥彭健新校長分別出唱片,成績唔差,校長更加唔駛講,B哥哥仲同時拍埋戲,八十年代唔少喜劇都有佢份,你睇番電影台重播就知,連星爺都同佢合作過套<新精武門1991>,入面瀟洒哥真係非常搶鏡,相信大家都睇過十幾廿次,同我一樣識背對白(即係「唔似貓、唔似狗、師奶淫得很」之類)。唔止架,B哥仲識吹色士風,當年有個花名叫KENNY BEE, 去到1988年,佢嘅婚禮直情係香港大事。 佢嘅曲風包容性好強,情歌固然得手,連林敏驄填俾佢嘅玩嘢歌都首首紅(<淚之旅>、<香腸蚊帳機關槍>、<非洲黑森林寫真集一日遊> 呢三部曲),呢類歌唔易HANDLE,俾著今時今日PLUG呢啲,已經被人封做「西歌」,但當年係攞晒獎嘅,冇得輸。 高大靚仔,唱歌作曲演戲瓣瓣惦,未算,當年佢仲著皮褸揸HARLEY DAVIDSON出入,係唔少人嘅Dream Bike,男人都當佢偶像,係啦,可能因為佢同時間係唔CHOK嘅。阿CHEF LE MON好在遲出道30年,如果唔係隨時冇掟企架。
環球媽咪姐
【星級專欄:媽咪姐】E神開Youtube,學做Youtuber ??
正所謂學無前後,達者為先。講媒體而家正正係soical Media嘅年代,做明星如果仲未識用Facebook丶IG丶Wechat丶微博以及Youtube Channel的話,對唔住~你真心與時代有些少脫軌啦!講起呢科嘢真心唔怕遲只要你OK願意接觸,其實機會大門永遠長開。就好似Eason咁,喺上星期就開咗自己嘅Youtube Channel,而且訂閱人數日日係咁升,貴為當代巨星有番咁上下號召力也是常識吧。之不過今次E神開Youtube Channel又會唔會學吓全職Youtuber咁拍吓旅遊片丶試食片丶搞笑片...大家又多一個網上平台可以日見夜見自己偶像哦。
環球媽咪姐
【星級專欄:媽咪姐】阿Sam & 阿Tam 有無機會再Happy Together Again呢?
《阿Sam & 阿Tam Happy Together》演唱會已經好評落幕,首首經典金曲勾起好多難忘回憶,莫講我地呢班老歌迷,佢地嘅歌就算依家嘅小朋友都會識唱!作為支持廣東歌中流砥柱嘅我媽咪姐亦感到無比自豪!希望兩位繼續合作年年開騷,令大家年年都可以再度回味! BTW校長暗示今次演唱會反應熱烈,嚟緊不久將來可能搵埋林子祥阿LAM合作,嚟個「阿Sam阿Tam同阿Lam」演唱會咁話!媽咪姐表示最期待的畫面出現了!下次演唱會又唔知會擦出咩火花呢? 藉呢個機會問問大家,如果阿Sam & 阿Tam再度聯手開演唱會,各位歌迷又想佢地合唱邊隻首本名曲呢? 1.幻影 2.霧之戀 3.滄海一聲笑 4.財神到 5 加埋阿LAM 唱十分十二吋
環球媽咪姐
【星級專欄:媽咪姐】AGA丶Gin Lee 真·友情不變!
話說早兩日有某媒體報導指AGA擺明唔妥Gin Lee 就連派歌都要搶先?? 我媽咪姐當堂嚇一跳,然後得啖笑,唔通媽咪姐同AGA丶Gin Lee老友鬼鬼又話過你知咩! 先講派歌先後次序一定,呢啲嘢公司一早計劃安排好,又點會輪到歌手之間去搶先出? 而報導又講"一山不能藏二虎",說話可以咁講,但事實呢個山(所屬公司:環球唱片)又點止兩隻老虎呢 ? 查實明事理一眼就知AGA同Gin Lee相識多年,經常齊齊開Live又出Show,之前"獨一無二"合唱歌又成功突圍,大收旺場。又試想想AGA丶Gin Lee拍住上又反應好,點會為呢D無厘頭事成為最佳損友呢 ? 你哋話媽咪姐有冇講錯先 ?
環球媽咪姐
【星級專欄:媽咪姐】Eason 號召力驚人 秒殺售票系統!
考考大家,香港有咩係最難搶?莫過於Iphone﹑平機票仲有演唱會門票,如果大家順利搶到其中一樣都要劏下豬,還下神,呢個比喻完全冇誇張到! 無錯!媽咪姐今次想講講陳奕迅「Eason says C'mon in~ 」音樂會香港站秒殺嘅售票情況。 今次音樂會喺麥花臣搞,門票只售四千張!無錯,係三千張,以Eason號召力四十萬張都唔夠啦!所以門票開賣唔夠十分鐘已經完全被樂迷KO... 媽咪姐同大家一樣F5到手軟都搶唔到,就算用盡樂壇江湖地位問人"R"都"R"唔到半張門票出嚟,睇黎今次又冇緣享受屬於「天國而落入凡間嘅E神」歌聲。 不過有得恨總好過冇得恨!就算撲唔到門票我媽咪姐亦會全力支持Eason同今次國語碟主題嘅音樂會!講到國語歌,唔少fans都對E神國語作品都滾瓜爛熟,瘋狂討論音樂會Eason將會演繹邊隻名曲。媽咪姐綜合網民意見整合,嚴選到11隻必聽嘅Eason國語歌,希望去唔到音樂會嘅人(包括我)都可以聽到今次佢音樂會再唱啦!(最好就出埋cd版啦~)
環球媽咪姐
【星級專欄:媽咪姐】邊個仲話樂壇青黃不接?呢度有兩小妹堅守奮戰
好多人話香港樂壇已死,其實香港好歌大家又細心聽過幾多? 媽咪姐其實好留意樂壇嘅滄海遺珠,真心希望佢地可以一個一個能夠實現自己歌唱夢想,能夠在香港甚至國際舞台發光發熱。 今次想同大家講下Robynn & Kendy呢兩個80後妹妹。 可能有好多人都不知道佢地是誰;有人會發現佢地樂壇失蹤,以為佢地唱生涯就咁byebye。亦有人認為佢地出身小康之家,冇必要去香港樂壇飽受考驗,但係傻豬嘅佢地依然一直堅持,努力去完滿佢地音樂夢。
環球媽咪姐
【星級專欄:媽咪姐】估你唔到?創作女孩AGA原來係運動好手
正所謂「運動女孩加10分」,經常做運動嘅女仔唔單只可以keep到身型最好﹑磨練意志,仲會成為最佳社交平台打卡方法!無可否認一張充滿活戶嘅戶外相,比一張較晒燈光set好cam既相實在得多! 如果又識唱歌,又經常運動,又才藝爆燈嘅女仔又會加幾多分呢?媽咪姐今次又講下AGA,最近佢去咗上海參加某大運動單位十公里比賽!跑開半馬嘅AGA,10K就好似食生菜咁易啦! 事實上,AGA俾樂迷一個印像都係一個又「夜間」又「悲情」嘅女性,實情AGA係一個又充滿活力而且又極之有喜感嘅歌手!大家又點估到佢其實咁熱愛運動呢?其實樂迷只係俾佢創作過嘅經典歌曲而定位佢係「悲情」歌手!唔通AGA會係3AM起身練跑媽咪姐又會講你知咩(笑)。 再講,AGA悲情歌確實係有感染力令到大家都好虐心,但其實好多舞林高手都會用佢悲情歌編舞放上youtube,當堂完全換埋風格充滿動感同埋活力! 所以大家唔好成日俾AGA創作歌曲形象呃到!事情係多種風格都可以同AGA產生化學反應!大家要拭目以待不斷進化成長的江海迦!挑戰呢場音樂路的人生馬拉松啦!
環球媽咪姐
【星級專欄:媽咪姐】Yan Ting靈異實錄 之 原來雲頂撞鬼歌手特別多?!
大家如果有睇ViuTv新一集 <晚吹> -- 總有一瓣喺左近,今次就訪問咗Yan Ting(周殷廷)之前去咗馬來西亞出名猛鬼嘅地方"雲頂",講述喺呢個地方發生嘅靈異事件 (有片 : https://goo.gl/Z5Lp9f )。 不過媽咪姐就話,去雲頂又未必個個都咁易撞到鬼嘅,據本小姐深入淺出分析過之後,撞鬼多嘅人應該歌手居多,事關早年蘋果動新聞都曾經報導過有3位歌手同去"雲頂"登台嘅超恐怖靈異事件( 有片 : https://goo.gl/ja6ewr )。 世事無奇不有,老土講句......"信不信由你啦!!"
環球媽咪姐
【星級專欄:媽咪姐】AGA為咗拍MV可以去到幾盡?
我媽咪姐一向對呢個創作歌女有啲好感,除咗基本作得唱得之外,佢對事情嘅投入同專注真係令一把年幾嘅我都熱血到爆!
環球媽咪姐
【星級專欄:媽咪姐】Gin Lee首次個人紅館Show講到明冇底線

近排Gin Lee(李幸倪)連媽咪姐都覺得真心”堅”,咁多年嘅努力再四圍挑機踢館參加音樂節目比賽(尤其是<超級巨星4踢館賽>仲好深入民心 ) ,到今日終於憑著一份”堅”毅不屈嘅精神,殺入每位歌手夢寐以求嘅紅館,舉行首個個人演唱會。媽咪姐仲收到可靠消息,遲吓有輯從未試過咁性感嘅做型照曝光,當中有小背心丶短裙仔..媽咪姐見到都嚇咗一跳,皆因之前Gin Lee記招已經講明今次紅館Show冇底線....
環球媽咪姐
【星級專欄:媽咪姐】校長撐廣東歌 本地網紅低調入圍!
媽咪姐得閒無事最鍾意上網求其搵啲片嚟睇,講起睇片,近期乜乜KOL丶Youtuber拍嘅搞笑片丶唱歌片,本小姐就最Like,內容夠貼地有啲又好盞鬼。
環球媽咪姐